បន្ទាប់ពីប្រកាសរំសាយមង្គលការ និងរង់ចាំអស់រយៈពេលជាង៣ឆ្នាំ តារាកំប្លែងCTNកញ្ញា នីឡា កូនស្រីអ្នកដឹកនាំកម្មវិធីសិល្បៈកម្សាន្ដដ៏ល្បី លោក សុវណ្ណ ឬទ្ធី ហៅតាវ៉ិចទ័រ បានទម្លាយដំណឹងថា នឹងចូលរោងការក្នុងខែមីនាខាងមុខនេះ ។
តាមគម្រោង នីឡា និងគូដណ្ដឹង ត្រូវចូលរោងការតាំងពីខែឧសភា ឆ្នាំ២០២០ មកម៉្លេះ ប៉ុន្តែដោយសារតែការរីករាលដាលនៃជំងឺកូវីដ-១៩ ទើបធ្វើឱ្យពួកគេត្រូវសម្រេចព្យាពេល និងបានប្រកាសរំសាយ។
នីឡា អតីតដៃគូចាស់នាយ ចឺម បានបញ្ជាក់ថា «អ្នកណាជំពាក់ចំណងដៃ នីឡា ខ្លះចេញមុខមក លើក៣ឆ្នាំហើយ សុំប្រាកដខែក្រោយនេះហើយ» ។ ដូចគ្នាកន្លងមក តារាកំប្លែងដែលពោរពេញដោយសមត្ថភាព និងរូបសម្រស់រូបនេះធ្លាប់អះអាងថា មង្គលការរបស់នាង និងគូដណ្ដឹង នឹងប្រារពធ្វើនៅកំឡុងខែ៣ ឆ្នាំ២០២២នេះ។
ងាកមកលោក សុវណ្ណ ឬទ្ធី ហៅលោកតា វ៉ិចទ័រ នៅលើគណនីហ្វេសប៊ុករបស់ខ្លួន បានបង្ហោះរូបថតកូនស្រី និងសារគួរឲ្យចាប់អារម្មណ៍ មុនពិធីមង្គលការមកដល់ថា «នៅពីរថ្ងៃទៀត ដល់ថ្ងៃមង្គលរបស់ កំពូលហើយ(នីឡា)គឺថ្ងៃទី19/03/2022»។
តាមរយៈសារ និងរូបថតនេះ អ្នកលេងបណ្ដាញសង្គមហ្វេសប៊ុកមួយចំនួន ឃើញហើយ ក៏អស់សំណើច អមដោយការលាន់មាត់សរសើរថា ឡើងCute ខណៈមួយចំនួនទៀត បានសម្ដែងការអបអរសាទរ និងជូនពរផងដែរ។
គួររំលឹកថា តារាកំប្លែងកញ្ញា វ៉ាន់ នីឡា កូនស្រីលោកតាវ៉ិចទ័រ ហៅ សុវណ្ណ រិទ្ធី បានប្រកាសរៀបអាពាហ៍ពិពាហ៍នាពេលកន្លងម្ដងរួចមកហើយ ប៉ុន្តែក៏ត្រូវពន្យារពេលវិញដោយគោរពតាមវិធានការសុខាភិបាលរបស់រាជរដ្ឋាភិបាលកម្ពុជា។
បើទោះបីជា នីឡា និងគូដណ្ដឹងទើបតែស្រឡាញ់ និងស្វែងយល់ចិត្តគ្នាក្ដី តែនាងតែងតែបង្ហាញអារម្មណ៍ជារឿយៗ ដោយពោលសរសើរអនាគតស្វាមីរបស់ខ្លួន ដែលតែងតែបង្ហាញក្ដីព្រួយបារម្ភ និងយកចិត្តទុកដាក់មើលថែ នីឡា គ្រប់ពេលវេលាតែម្ដង៕
