លោកអ្នក បានជ្រាបរួចមកហើយថា មួយរយៈចុងក្រោយនេះ អ្នកលេងបណ្ដាញសង្គមហ្វេសប៊ុកមួយចំនួន ហាក់មិនអស់ចិត្តនោះទេ ក្រោយពីដឹងអាយុពិតរបស់តារាចម្រៀង សោភា ទេពី ឆ្នាំនេះ ទើបតែឈានចូលដល់វ័យ១៨ឆ្នាំនោះ។
ការមិនអស់ចិត្តនោះ ត្រង់ថា កាលពីចូលរួមប្រឡងកម្មវិធីលំដាប់ថ្នាក់ពិភពលោកCambodian Idol រដូវកាលទី៣ អំឡុង ឆ្នាំ២០២១៧នោះ គេឃើញឈ្មោះរបស់នាង អមដោយអាយុ បង្ហាញលើកញ្ចក់ទូរទស្សន៍ នាងមានវ័យ១៦ឆ្នាំ។ ដូច្នេះ បើគិតមកដល់ឆ្នាំ២០២១នេះ គួរតែអាយុរបស់នាងច្រើនជាង១៨ឆ្នាំ។
ទោះយ៉ាងណា ជុំវិញរឿងនេះ កញ្ញា សោភា ទេពី ធ្លាប់ចេញមុខបញ្ជាក់ច្រើនដងមកហើយ ថែមទាំងធ្លាប់បង្ហាញនូវសំបុត្រកំណើត ក៏ដូចជាអត្តសញ្ញាណប័ណ្ណរបស់ខ្លួនផ្ទាល់ ដើម្បីបញ្ចប់ការងឿងឆ្ងល់ពីបណ្តាអ្នកគាំទ្រ ដែលគិតថា នាងកុហកប្រាប់អាយុមិនពិតផងដែរ។
ក្រោយការបង្ហាញបែបនេះហើយក៏ដោយ ក៏នៅមានមតិមួយចំនួន កើតការសង្ស័យ ដដែល ទើបកាលពីថ្ងៃទី៦ ខែសីហា ឆ្នាំ២០២១ សោភា ទេពី បានបង្ហោះស្ក្រីនសត បង្ហាញភស្តុតាងជាច្រើន សន្លឹក អមដោយសារ ធ្វើការបកស្រាយច្បាស់ៗផងដែរ។
សោភា ទេពី បានបកស្រាយដូច្នេះថា «បើអត់ដឹងច្បាស់កុំទាន់និយាយកាលប្រលងចម្រៀងខ្ញុំអាយុ១៤ឆ្នាំទេ តែខ្ញុំដំឡើង១៦ឆ្នាំ ដើម្បីបានប្រលងតើ ខ្ញុំកុហកបានអីមកខ្ញុំវិញ បើឆ្នាំនឹងខ្ញុំអាយុ១៨មែន ហើយមុខចាស់ឬក្មេងមិនសំខាន់ សំខាន់អ្នកចេះរកលុយខ្លួនឯងបាននៅ
ឬអាយុប៉ុណ្ណឹងនៅសុំលុយម៉ាក់ប៉ាអ្នកចាយទេ ខ្ញុំមិន ដែលឈឺក្បាលរឿងនឹងទេ មានតែសប្បាយចិត្តដែលខ្ញុំអាយុប៉ុណ្ណឹងហើយខ្ញុំអាចជោគជ័យបានប៉ុណ្ណឹង ថ្ងៃខែឆ្នាំកំណើតរបស់ខ្ញុំ ឆ្នាំមមែ 5/5/2003 _ 5/5/2021 ជួយបូកដកអោយខ្ញុំផង»។
នៅក្នុងស្ក្រីនសតនោះ ក៏មានការបកស្រាយពីសំណាក់ឪពុករបស់ សោភា ទេពី ផងដែរ ហើយក្រោយពីមានសារព័ត៌មានមួយចំនួនចុះផ្សាយ សោភា ទេពី បានបញ្ជាក់ទៀតថា «អរគុណដល់បងសារព័ត៌មាន ដែលបកស្រាយយ៉ាងច្បាស់ៗពីអាយុ និងការងារសិល្បៈរបស់នាងខ្ញុំ សោភាទេពី
បើបងប្អូនណាមិនជឿក៏ហីទៅចុះ. សំខាន់នាងខ្ញុំ និងឪពុកខ្ញុំ បានបកស្រាយបញ្ជាក់រួចរាល់ហើយ ចង់ប្រាប់ថា ខ្ញុំកើតឆ្នាំមមែ ថ្ងៃទី5 ខែ5 ឆ្នាំ2003 – ឆ្នាំ2021នេះខ្ញុំអាយុ18ឆ្នាំ សូមបងប្អូនគិតពិចារណាដោយខ្លួនឯងចុះ»។
លើសពីនេះ ដើម្បីកុំឲ្យកាន់តែច្បាស់ទៀតនោះ សោភា ទេពី បានបញ្ជាក់បន្ថែមទៀតថា «សុំទោស! មិនចេះអត់ទេឬ ? តើចង់អោយខ្ញុំបកស្រាយប្រាប់ប៉ុន្មានលានដងទៀតទៅ ខ្ញុំកើតឆ្នាំមមែ ថ្ងៃទី5 ខែ5 ឆ្នាំ2003 – 2021 = ? សូមមេត្តាជួយដកលេខតាមគណិតវិទ្យាផង តើខ្ញុំមានអាយុប៉ុន្មានដែរ? សូមឆ្លើយ?»៕
