លោកអ្នក បានជ្រាបរួចមកហើយថា តារាចម្រៀងតន់ ចន្ទសីម៉ា ជាអតីតជាសិស្សជយលាភីស្មូតកំណាព្យលេខ១ប្រចាំ ខេត្តតាកែវ ហើយមាននិស្ស័យសិល្បៈទាំងពីកំណើត ដោយនាងមានឪពុកជាមន្ត្រីរាជការ ម្ដាយជាស្ត្រីមេផ្ទះ។
ពេលឈានជើងចូលមកកាន់ទីក្រុងភ្នំពេញដំបូង តន់ ចន្ទសីម៉ា មានតែម្នាក់ឯង គ្មានគ្រួសារ សាច់ញាតិអ្វី ដែលអាចពឹងពាក់បានឡើយ។ ដូច្នេះហើយ រឿង ដែលនាងត្រូវធ្វើពេលនោះ គឺត្រូវខំរស់ដោយខ្លួនឯង ព្រោះស្ថានភាពគ្រួសាររបស់នាង ក៏មិនជាធូរធារដែរ។
ទោះយ៉ាងណានៅពេលនោះ ដោយសំអាងលើទេពកោសល្យសិល្បៈចម្រៀងរបស់នាង នាងក៏ចេញរកការងារធ្វើ ហើយជាភ័ព្វល្អ នៅខ្ទង់ពាក់កណ្ដាលឆ្នាំ ២០១៧ នាងត្រូវបានថៅកែហាងមួយ ព្រមទទួលយកនាងធ្វើជាតារាចម្រៀងក្នុងហាងរបស់ខ្លួន ហើយពេលនោះ ជីវិតតស៊ូ ជាអ្នករៀនផង ធ្វើការផង ក៏បានចាប់ផ្ដើមឡើង។
ក្រោយពីច្រៀង នៅក្នុងហាង បានមួយរយៈធំ នាងក៏បានឈប់វិញ ហើយក៏បានដាក់ពាក្យប្រឡងក្នុងកម្មវិធីប្រឡងចម្រៀងលំដាប់ពិភពលោក The Voice Cambodia នាឆ្នាំ២០១៦ ហើយក៏ធ្លាក់ក្នុងវគ្គ Live Showសប្ដាហ៍ទី៤។
បរាជ័យនៅពេលនោះ មិនបានធ្វើឲ្យសីម៉ា បា.ក់ទឹកចិត្ត ឬរុញរា ក្នុងការបន្តការងារសិល្បៈនោះឡើយ គឺរឹតតែធ្វើឲ្យនាងតស៊ូរហូតមានលទ្ធផលដូចសព្វថ្ងៃនេះ ដោយក្លាយជាតារាចម្រៀងល្បីឈ្មោះទាំងវ័យក្មេង។
និយាយពីសមត្ថភាពច្រៀងបទខ្មែរវិញ សីម៉ា ច្រៀងបានយ៉ាងពីរោះ និងទទួលបានការគាំទ្រច្រើនណាស់ ដោយរាល់បទនាងនីមួយៗមានអ្នកទស្សនាច្រើនលើសលប់។ ទោះយ៉ាងណា កន្លងមក អ្នកគាំទ្រ ទំនងជាមិនសូវបានស្ដាប់នាងច្រៀងជាភាសាអង់គ្លេសនោះទេ។ តែមួយរយៈចុងក្រោយនាងចាប់ផ្ដើមហាត់ច្រៀងជាបន្តបន្ទាប់នៅលើបណ្ដាញសង្គមទីកតុក។
អ្វី ដែលធ្វើឲ្យអ្នកគាំទ្រចាប់អារម្មណ៍ និងភ្ញាក់ផ្អើលនោះ គ្រាន់តែការហាត់ច្រៀងសោះ សីម៉ា ធ្វើបានយ៉ាងល្អ ស្ដាប់ទៅ ដូចជនជាតិអ្នកច្រៀងអញ្ចឹង រហូតពួកគេលាន់មាត់សរសើរគ្រប់វីដេអូ ដែលនាងច្រៀងជាភាសាបរទេសនោះតែម្ដង។
ក្នុងចំណោមការច្រៀងបទជាភាសាអង់គ្លេសជាច្រើនបទនោះ យើងសូមលើកយកតែបទមួយមានចំណងជើងថា «Someone you love» ដែលសីម៉ា ច្រៀងថ្មីៗនេះប៉ុណ្ណោះ ដោយទទួលបានការសរសើរខ្លាំងមែនទែន។
អ្នកគាំទ្រ បានវាយតម្លៃចំពោះការច្រៀងរបស់សីម៉ាយ៉ាងដូច្នេះថា «ពីរោះណាស់លោកអើយ, បទម៉េចក៏មិនចេះទើស Love you so much, ទាំងសុជីវធម៌ ទាំងកម្រិតវប្បធម៌ ទាំងសំឡេង បងពិតជាអ្នកចម្រៀងពិតមែន, ពីរោះដល់ហើយ,
សំឡេងគ្រហឹមគាត់ស្រដៀងបង មាស សុខសោភា និងភាគច្រើនស្រដៀងបងខេមរៈ ស្រីពៅ នេះជាការយល់ឃើញរបស់ខ្ញុំ សុំទោសបើនិយាយខុសត្រូវអីណា, ពីរោះម្ល៉េះទេ, ពីរោះជាងបទខ្មែរទៀត, ច្បាស់ៗល្អណាស់ ពីរោះមែន, ដូចម្ចាស់បទណាស់»៕
