ភ្នំពេញ ៖ ថ្ងៃនេះគេហទំព័រកម្សាន្តយើងខ្ញុំ សូមនាំអារម្មណ៍ប្រិយមិត្តមកស្គាល់និងដឹងពីប្រវត្តិពិតរបស់អតីតfreshie boy and girlជាប់ចំណាត់ថ្នាក់លេខ១កាលពីឆ្នាំ២០០៣ជំនាន់ជាមួយលោក ជា វិបុល គឺអ្នកនាង សៅ ឆេងហុង ក្រោយពេលដែលផ្អាកពីវិថីសិល្បៈមានរយៈពេលប្រមាណជិត៦ឆ្នាំកន្លងមកនេះ។
ផ្អែកតាមផេកMovie star research រៀបរាប់ថា ថ្ងៃនេះសូមលើកយកអំពីដំណឹងរបស់អ្នកនាង សៅ ឆេងហុង ដែលជាអតីត freshie boy and girl ជាប់ចំណាត់ថ្នាក់លេខ១កាលពីឆ្នាំ ២០០៣ ជំនាន់ជាមួយលោក ជា វិបុល នៅក្នុងស្ថានីយទូរទស្សន៍ប៉ុស្តិ៍លេខ៣នៃក្រុមហ៊ុនទូរស័ព្ទSamart ថែមទាំងទទួលបានពានរង្វាន់មួយផ្នែកទៀត ខាងយុវនារីដែលថតរូបស្អាតបំផុតរបស់ក្រុមហ៊ុន Konika នៅក្នុងឆ្នាំតែមួយ។
បន្ទាប់មកទៀតអ្នកនាង សៅ ឆេងហុង បានធ្វើកុងត្រាមួយឆ្នាំជាមួយក្រុមហ៊ុនដើម្បីធ្វើជាពិធីការិនី ក្រោយពីបញ្ចប់កិច្ចសន្យាជាពិធីការិនី អ្នកនាង សៅ ឆេងហុង ក៏បានលាឈប់ពីសិល្បៈ ដើម្បីមកបន្តការសិក្សាថ្នាក់បរិញ្ញាបត្រផ្នែក Accounting នៅសាលា វ៉ាន់ដា ដោយទទួលបានចំណាត់ថ្នាក់លេខ ១ប្រចាំសាលា ដែលប្រគល់សញ្ញាបត្រជូន អ្នកនាង សៅ ឆេងហុង ដោយសម្តេចតេជោ ហ៊ុន សែន ទៀតផងកាលពីឆ្នាំ២០០៥។
ក្រោយមកអ្នកនាង សៅ ឆេងហុង ត្រូវបានលោក ហ្វៃ សំអាង ទាក់ទងដើម្បីថតភាពយន្ត ប៉ុន្តែដោយសារក្រុមគ្រួសារស្រឡាញ់ខាងសិក្សាទើបអ្នកនាងផ្អាកមិនទទួលគ្រានោះដែរអ្នកនាងទៅរៀនខាងជំនាញ អ៊ុតសក់ នៅសាលាគ្រីស្ទីណា ដោយទទួលបានសញ្ញាប័ត្រផ្នែកកែសម្ផស្សទៀតផង ។នៅក្នុងឆ្នាំ ២០១៣ មានក្រុមហ៊ុនទូរទស្សន៍មួយនៅសហរដ្ឋអាមេរិក រដ្ឋកាលីហ្វ័រនីញ៉ា បានទាក់ទងអ្នកនាង សៅ ឆេងហុង ដើម្បីទៅប្រឡងក្នុងកម្មវិធី បររកញ្ញាខ្មែរអាមេរិកដោយអ្នកនាងទទួលបានចំណាត់ថ្នាក់លេខ ២ នៅវគ្គផ្ដាច់ព្រ័ត្រ។
ប្រភពពីអ្នកនាង ស៊ិន ឧត្តមផល្លា កាលនៅមានជីវិត បន្តទៀតថា នេះអាចចាត់ទុកថាជាភាពជោគជ័យផ្ទួនៗគ្នានៅក្នុងឆាកជីវិតរបស់អ្នកនាង នឹងមានអ្នក ស្ពនស័រ ដែលធានាអោយអ្នកនាង សៅ ឆេងហុង ទៅច្រៀងតាមបណ្ដារដ្ឋផ្សេងៗ ពេលនោះហើយដែលអ្នកនាង សៅ ឆេងហុង បានជួបគូជីវិតនៅលើទឹកដីអាមេរិក ក៏បានរៀបអាពាហ៍ពិពាហ៍ និងរស់នៅលើទឹកដីអាមេរិកនេះ៦ឆ្នាំមកហើយ សព្វថ្ងៃនេះអ្នកនាងមានបុត្រចំនួនពីរនាក់ស្រីទាំងពីរ កូនស្រីច្បងអាយុ ៤ឆ្នាំ និងកូនប្អូនអាយុជិត ២ខែ ។ បច្ចុប្បន្នថ្ងៃនេះអ្នកនាង សៅ ឆេងហុង ដែលរស់នៅក្នុងប្រទេសអាមេរិកនេះ អ្នកនាងប្រកបមុខរបរជាជាងធ្វើក្រចក និងក្រៅពីនោះក៏មានអាជីពជាតារាចម្រៀងផងដែរ៕
