ភ្នំពេញ ៖ រំលឹកកាលពីអំឡុង ថ្ងៃទី១១ ខែឧសភា ឆ្នាំ២០២០នេះ ជាថ្ងៃខួបអាពាហ៍ពិពាហ៍គម្រប់៤ឆ្នាំរបស់តារាចម្រៀងមាឌល្អិតកែវ វាសនា, ស្រាប់តែភរិយាលោកទម្លាយរឿងស្គាល់គ្នា១៣ឆ្នាំ បែកគ្នារាប់ភ្លេចទម្រាំបានការរៀបការជាមួយគ្នារហូតមានកូន៣នាក់នោះ។
ភរិយាលោកកែវ វាសនា បានបង្ហោះសារ រៀបរាប់ពីជីវិតមុន និងក្រោយរៀបការដូច្នេះថា រយៈពេលស្គាល់គ្នា១៣ឆ្នាំ បែកគ្នារាប់មិនអស់ ទម្រាំបានការជាមួយគ្នា រយៈពេលរៀបការជាមួយគ្នា៤ឆ្នាំ បានកូន២ ប្រុសមួយ ស្រីមួយ តែពេលនេះជីវិតយើងជោគជ័យហើយ ក្នុងគ្រួសារតូចមួយនេះ។
កូនស្រី សេដ្ឋីជនបទរូបនេះបន្តថា អរគុណប្តីសម្រាប់ផ្តល់ភាពស្មោះត្រង់ និងស្រលាញ់ប្រពន្ធកូន ដែលតែងគិតប្រពន្ធម្នាក់នេះជាធំរហូតកន្លងមក អូនឆ្នាល់ កាច ក៏បងមិនប្រកាន់ច្រើននឹងអូនដែរ ជាពិសេសអូនចង់បានអ្វី ចង់ចាយលុយបែបម៉េច ក៏បងមិនដែរសួរនាំដែរ បងមិនចង់ដឹង អ្វីទាំងអស់សំខាន់អោយតែប្រពន្ធម្នាក់នេះសប្បាយចិត្ត ព្រោះយើងមុនបានគ្នា ជូរចត់ មានអ្នកបំបែកអូនពីបងច្រើនណាស់ តែទីបំផុត យើងចាប់ដៃគ្នា សាងគ្រួសារមួយយ៉ាងកក់ក្តៅ ហើយពោរពេញ ដោយសុភមង្គល មិនខ្វះមុខ មិនខ្វះក្រោយ សង្ឃឹមការស្រលាញ់មួយនេះ នៅបែបហ្នឹងដល់យើងចាស់ស្លាប់ ស្រលាញ់ប្តី និងកូនៗណាស់ Keo Veasna Real។
មុននឹងភរិយាខ្លួនបង្ហោះសាររៀបរាប់រឿងខាងលើនេះ លោកកែវ វាសនា ផ្ទាល់ នាថ្ងៃទី ១១ ខែឧសភា ឆ្នាំ ២០២០នេះ បាននាំ ភរិយា ទៅស្រស់ស្រូប អាហារ ហើយបានធ្វើការបង្ហោះសារដែរថា ថ្ងៃនេះ ជាថ្ងៃខួបរយៈពេល៤ឆ្នាំ ដែលយើងបានរៀបការ មានឈ្មោះជាប្តីប្រពន្ធ អរគុណអូនគ្រប់យ៉ាង ដែលចូលមកជីវិតបង ហើយបង្កើតកូនស្អាតៗ អោយបងពីរនាក់ អោយទៀត ជីវិតខ្ញុំសំណាងណាស់ ដែលយកប្រពន្ធត្រូវ Love u oun Lim Sokuntheary។
គួរបញ្ជាក់ថា ម្ចាស់បទ«កុលាបពុលដី» លោក កែវ វាសនា បានសម្រេចចិត្តបញ្ចប់ភាពនៅលីវហើយ កាលពីថ្ងៃទី១១ ខែឧសភា ឆ្នាំ២០១៦ ជាមួយនឹងកូនស្រី របស់សេដ្ឋីជនបទ ឈ្មោះ«សេដ្ឋីលី» ក្នុងស្រុកមង្គលបុរី ខេត្តបន្ទាយមានជ័យ។
ក្នុងពិធីមង្គលការរបស់លោកនោះ គេកត់សម្គាល់ឃើញថា អ្នកសិល្បៈជិតស្និទ្ធ មួយចំនួនធំ មិនបានទៅចូលរួមដោយផ្ទាល់នោះទេ ពោលគឺពួកគេអាចនឹងចាំ ជួបជុំគ្នា ម្ដងទៀត នៅក្នុងទីក្រុងភ្នំពេញ ក្នុងពិធីកាត់ចំណងដៃ។
ក្រោយរៀបការ បើគិតមកទល់ពេលនេះ លោក កែវ វាសនា បានជោគជ័យយ៉ាងខ្លាំងជាមួយនឹងការសាងសង់វិឡារតម្លៃជាង៨០ម៉ឺនដុល្លាររួចរាល់ ព្រមទាំងមានកូនក្នុងបន្ទុកគ្រួសារចំនួន២នាក់ទៅហើយ តែសម្រាប់ទំនាក់ទំនង និងក្តីស្រលាញ់ រវាងប្រពន្ធ នៅតែស្រលាញ់លើសដើម មិនប្រែប្រួលទៅណាទេ៕
